هل أنا موجود؟!!

 هل معنى إني ارى الطريق أمامي ممهدا اني انظر الى الأمام؟؟ غريبة هي هذه الدنيا كثيرون مشوا في طريقهم للأمام ثم اكتشفوا انهم كانوا عائدون لنقطة البداية .. كثيرا أسأل نفسي هل أنا موجود أم إني مجرد تجسيد لروح و أفكار. بمعنى هل نحن من نشعر و نتصرف بناءا على شعورنا أم أننا نجسد شعور هو أصلا موجود ؟! هل من الممكن ان تكون الحقيقة ان أرواحنا هي التي تتعامل سويا و أننا مجرد خيال غير ملموس؟! من المتحكم في من هل أنا من اتخذ القرار ؟
 لحظة لحظة.. هل من الممكن ان نكون مجرد أفكار تدور في عقل شخص ما؟! وأننا لسنا بشر؟ ماذا ان كننا ذكريات و ستنتهي ؟؟ ما هذا هل أنا مجرد منفذ لأفكار شخص آخر؟ أنا لست هنا أصلا؟ هل معنى ذلك ان حبيبتي هي أيضا ليست حقيقة و أن كلانا رهن تفكير شخص؟ ماذا ان حدث وانشغل بأفكار جديده و نسى أحدنا؟! و ماذا ان كننا مجرد ذكريات داخله و كانت النهاية قريبة؟؟! يا هذا اجبني هل أنا و حبيبتي مجرد ذكرى داخلك؟! لماذا إذن تتذكر حياتك في هيئتى أنا..فلتتذكر بشخصك أنت وهيئتك.. هيئتى؟!! ان كنت ذكرى فأنا أصلا هو أنت؟!!
  ما هذا الخبل الذي أقوله؟؟ ولكن مهلا هناك مصيبة أكبر ماذا ان كانت حبيبتي حقيقة و أنا مجرد فارس أحلام في عقلها؟ ولكن لا لا كيف هذا و أنا أعيش حياتي اليومية عادي و هي ليست موجودة.. ليست موجودة؟!! ولكنها تعرف كل ما أقوم به .. أم أنها من تتخيل هذه الحياة وأنا أجسدها .. لا لا ما هذا الهراء الذي أقوله .. هل معنى ان الطريق ممهد!!!!تبا لك يا هذا حتى ان كنت فكرة من أفكارك فلا تزاحمني مع أسئلتك العقيمة فلتترك لي مساحة من عقلك.. أريد ان أصل الى حل في تفكيري أم ان هذا أصلا تفكيرك أنت؟!! .. هل معنى ان الط....

 أشقاني التفكير في هذا الموضوع و اكتفيت بأني راضي ان أكون أي شيء ما دامت حبيبتي معي كل ما أتمناه ان لا يكون حظي أننا مجرد ذكريات حزينة في نفس شخص مجروح يمحينا من حياته يوم ان يستطيع....  

  خير لك من مجادلة من تختلف معه في الرأي ان تسعى لتتأكد من صحة معتقداتك ثم ان تسعى بعد ذلك لتصل الى نتيجة تظهر بها صحة قولك .. عندها ستختصر الجدال كله الى كلمتين(مش قلتلك)

 آخر ما تحتاج اليه ان تكسب جدالا أمام الناس بمجرد الكلام فبعد ان تكسب ستجد نفسك تحت دائرة الضوء من الناس من ناحية و ستجد مجادلك متحفز لإثبات خطأك من ناحية أخرى و هنا يصبح المشوار شاقا و يحتاج جهدا مضاعفا و ان لم تصل لنتيجتك التي وعدت بها حينما كنت تجادل فقدت مصداقيتك عند جماهيرك ولمع نجم مجادلك وان كان على باطل ..

 أعمل في صمت و اخرج بنتيجة معقولة تجد نفسك في المقدمة مبتسما و أنت تشفي داخلك الشعور بالثقة .. 

   لا تنسى ان تبدأ المشوار بالتأكد انك على صحة لربما تكن أنت على باطل و تتخيل ان صمت خصمك يعني انتصارك .. في حين يكون خصمك هو من ينفذ نصيحتي !!

أسطورة محمد محمود في عهد التحرير

 سبحان الله علينا نحن شعب مصر!! بنعايب على المشير انه ماشي بنفس ترتيب مبارك مع أننا إحنا برده ماشيين بنفسع ترتيبنا . كلنا مضايقيين و متضامنين مع التحرير ، وبعد أول بيان كلنا ننزل ، بعد كده خطاب مؤثر نبدأ نتقسم بعديه. طيب ممكن بقى نفتكر بقى ايه حصل في الآخر مع العلم ان الآخر ده لسه ماجاش.

لكل واحد بيقول دول بيخربوا و عايزين يروحوا الداخلية و الداخلية بدافع عن نفسها. أنا مش بهاجم تفكير حد بس أنا عايزكم تفكروا أننا بنتكلم عن جيش المفروض أنه مدرب على حرب ممكن نتخيل أنه مش عارف يفض اشتباكات في شارع؟!! ماهو لو مش عارف يفضها يبقى جيش فاشل ولا يصلح أنه يدافع عن بلدنا مش أنه يديرها ، ولو هو سايبها لغرض ما - و دا اقتناعي الشخصي- يبقى مصيبة .
النهادره تم رفع فيديو يبين محاولة الثوار تهدئة الوضع في شارع محمد محمود و اللي انتهت كالعاده بفشل المحاولة من طرف الداخلية http://www.youtube.com/watch?v=IiTUlRTtLP0&sns=fb
واللي بيحصل في الفيديو ده عايز واحد يبرر هما ضربوا خرطوش و غاز ليه؟!! دي الناس كانت بترجع التحرير. وبعدين هما ليه بيكلمونا أننا من بلد تانية لو خوفهم ان الثوار يهجموا على الداخلية يرجعوا يقفوا عند مبنى الداخلية ولما حد يروحلهم هناك يبقوا يقتلوه ساعتها محدش هيلوم عليهم، وبعدين ليه الكلام ده محصلش في يناير ؟ مع ان أكيد الوضع مع الداخلية كان أسوأ كتيير

بلاش التأثر بخطاب إنشا وتعالوا نفتكر خطاب مبارك واللي حصل بعديه . أنا عن نفسي أصبح الموضوع بالنسبة لي تار الناس اللي ماتت فالتحرير فرضا وأنا بقول فرض لأني شايف ان ده محصلش انهم عبروا عن رأيهم غلط.فأنا شايف ان المجلس كان في أيديه يحقن دماء المصريين بمليون طريقة، وبعدين ليه ديما بعد أي خطاب فيه سياسة (لموا الدور ) بيبقى في تصعيد زي قنابل الغاز الجديدة اللي استخدمت امبارح بعد الخطاب و هل دي صدفة؟!! يعني النوع التاني خلص في نفس الوقت مثلا؟!!
في وجهة نظري المجلس العسكري بيلعب بينا شطرنج يا مصريين و بيوجهنا حسب رؤيته واللي أنا دلوقتي مش بشكك في نوايا الرؤية دي ممكن تكون من مبدأ وطني وخوف على مصر مش شرط تكون نية سيئة ولكن أنا أرفض فرض رؤية معينة علي كإنسان، أنا من حقي أرسم مستقبلي باختياري. مشكلة المجلس أنه بيدير البلد باستراتيجية حرب زي جس النبض باخبار متقطعة و خدع حربية زي موضوع الاستفتاء من الآخر كأنه عايز يمشي البلد في اتجاه معين .

لو كل واحد فكر براحة هيلاقي وجهة نظره في كل الأحزاب والأشخاص أتغيرت في اليومين اللي فاتوا ناس كنت بتكرهم فجأة طلعوا رجالة والعكس. مثلا الواضح بالنسبة لنا ان الإخوان أصبحوا مثالا للخيانة و انهم بيدوروا على الكرسي وبس - مع إني مش من مؤيدي الإخوان- ولكن اعتقادي ان الجماعة التي طالما كانت مثالا للتنظيم والدهاء السياسي انها بالغباء أنها تعادي الميدان في هذا الوقت، أنا لا أعرف سبب فعلهم ولكن يساورني إحساس قوي أنه مخطط مدروس جدا. أيضا فجأة أصبح البدوي و موسى متحدثين و مفاوضين مع المجلس؟؟!! وفد و وطني؟؟! بين قوسين فلول بتفاوض فلول!! و أمثلة اللعب في الدماغ الفترة اللي فاتت كتيير أوي
في وجهة نظري دي لعبة من المجلس عشان يوجهنا لناس وتيار ضد تيار و بعدين يلا انتخابات حالا في وسط ما نص المرشحين طلع شكلهم وحش قدامك طب اختار بقى من النص الحلو اللي المجلس موافق عليهم و طلعهم بصورة الوطنيين .
يا جماعة دا مجلس وظيفته الأساسية يحط استراتيجيات حرب مابيقلوش كلمة مش مقصودة حتى لو كلمة بنتريق عليها بيكونوا قايلنها عشان نتريق عليها.
طبعا أنا عارف ان كلامي مش هيعجب ناس كتيير و بيني و بين نفسي أتمنى يكون غلط و خلونا نتعامل بمبدأ حرص و متخونش. الانتخابات في معادها و دا شيء جميل جدا ولكن خلونا نركز أننا ننتخب الأشخاص لأشخاصهم و ليس لتياراتهم التي هي تذبذب أمامنا في موقف اختل فيه اتزان الجميع. معظم المرشحين معروفين باشخاصهم عندنا في وجهة نظري أنا لو على معرف بفلان و أعرف أنه أهل لتمثيلي في المجلس ثم وجدته مرشح لحزب ما فيجب ان أكون واثقا في اختيار هذا الرجل و ألا أغير رأئي لمجرد أنه في الحزب الفلاني و اذهب لأرشح فلان الذي لا يصلح لمجرد أنه مرشح حزب كذا الذي ساعدنا في الميدان. دعونا لا نخلق حزب وطني جديد.

في نفس الوقت يجب ان لا نتنازل عن مطالبنا أو ان نرضى بقلبله كما تعودنا دائما. و ألا نفرح بسلسلة مواقف غير مجدية و غير مستمرة مثل تحقيق سريع و كبش فداء و تعويض. نحن نريد قرارات مصيرية مرضية تخطو بنا للأمام.

نعم مع البقاء في الميدان و لكن دعونا نضيع عليهم أي فرصة للإيقاع بنا في مصيدة الخطأ دعونا نلعبها معهم بذكاء الصقر ليس بغشم الدببة. ولكل من يقول أصبروا 7 أشهر و ان  لم يلتزموا نعود للميدان. عزيزي أنا كمصري لست مستعد ان أعود كل 7 أشهر لأضحي ب 50 شهيدا ولذلك فلن أوافق على إخلاء الميدان هذه المرة بدون حق شهدائنا.

أخيرا جزيل الشكر لمشايخنا( على حد قول التلفزيون المصري ) الذين توسطوا منذ ساعات لهدنة بشارع محمد محمود و ان كنت أظن ان هذا التوقيت أيضا لأنصياع الداخلية لمحاولات المشايخ ليس محضا للصدفة.

أيها المجلس الآن فهمت الفوضى التي خيرنا مبارك بينه وبينها و كان أسهل ان يقول ياأنا يا المجلس. يسقط يسقط حكم العسكر

اختلفت الأسباب .. و المشير واحد

التحرير.. البلطجية.. عيال هبلة.. خليكم قاعدين.. انسحاب قوات الأمن.. هجوم على الثوار!! حد بس بفكرني كده هو النهارده 19 نوفمبر ولا 28 يناير.. بقولكم ايه مفيش وقت نفتكر قوموا روحوا بسرعة قبل موقعة الجمل ولا يمكن من أجل التجديد المره دي تبقى أحصنه ولا حاجة!!

نفس سيناريو اللي حصل 25 يناير بيتكرر ؟؟ للدرجة دي إحنا بالغباء السياسي ده؟ يا عزيزي المشير القصة دي اتهرست في فيلم قبل كده كنت حاول تجدد يا فندم .

اللي بيحصل النهارده ده ليه معنى من 3 :

1- ان المجلس العسكري و حكومته من بقايا النظام السابق فعلا و من مبدأ العشرة متهونش غير على ابن الحرام .. فهما حاليا بيطلعو عين أهل ولاد الحرام اللي هما إحنا طبعا. و الحل ده أنا شخصيا أستبعده في موقف النهاده و إن كنت لا أستبعده بشكل عام

2- إن هذا مجلس عسكري لا يستطيع ادارة هذه البلد و إن الفلول والمندسين (على حد قولهم) بيعملوا معاه الدنيئه ، و دي برده مش مشكلتنا مادمت لا تستطيع حمايتي يا عزيزي المشير خليني اختار اللي يحميني ، و على الأقل اطلع واجهني و فهمني ايه اللي بيحصل وكفاية كذب و تزييف للحقائق ومدام يا سيدي الفلول أرهقوا القيادة. رجاءا أعطي السلطة لشخص يستطيع الشعب الثقة في مصداقيته

3- الحل ده هو تحليلي الشخصي للموضوع. إن السلطة حاليا مثلها كمثل طبق سلطة جامد جدا أتعمل في وقت صعب وبعدين نسينا نحطوا في التلاجة 10 شهور يا جماعة كتيير بردو فطبيعي أنه يعفن زي اللي قبله. مشكلة القيادة الحالية ( و أنا لسبب ما لا أعرفه لا أشكك في وطنيتهم) انهم تقريبا بيذاكروا سياسة من كتاب الحزب الوطني تقريبا كده أخدوه من مبارك وهو بيسلمهم العربية- قصدي مصر - قبل مايركبوها. فطبيعي انهم يسوقوا بنفس الغباء السياسي والفشل في امتصاص الغضب واتخاذ قرارات سليمة والبطأ الرهيب في كل شيء نفس السياسة القديمة مع افتراض النية الحسنة فيا عزيزي المشير إن كنت ستتعامل معنا بمبدأ إنما الأعمال بالنيات ثم تدهسنا. فاحب أقولك لو شبهنا النهارده بيوم 28 يناير فكلها 13 يوم و نقوم إحنا كشعب بطرد معاليك و حكومتك زي يوم 11 فبراير بالضبط وبرده يا فندم هيبقى مش قصدنا والله نيتنا طيبة 

أرجوك يا أيها المشير سيب أم كتاب مبارك وفكر بعقل مصري بلاش قرارات شبيهه بنظام ( يانا يا الفوضى ) بلاش تاجيل انتخابات و دستور ( نفس مبدأ الداخلية في يناير بتاع مش أنتو معتصمين طب مش شغالين. ليس من حقك أنت تعاملني بمبدأ الثواب والعقاب المفروض أنت من يخدمني وليس العكس ) و نصيحة أخيرة لو كان حسني مبارك رمى الكتاب في آخر خطاب له و طلع أتعامل معانا بالبلدي كان زمانه دلوقتي بيتعملوا ميدان بل ميدان التحرير

عزيزي المشير أرمي الكتاب و حاول تلحق الموقف قبل ان يهل علينا سامي عنان بخطاب يعلن فيه تنحي سيادتك و ساعتها صدقني لن يرحمك مصري واحد

ويا مصريين مش وقت سلفيين و إخوان و علمانيين دلوقتي ولا وقت القاء اتهامات ومين وقع الميدان و مين البطل كلنا مضحوك علينا ومازلنا في نفس المسرح السياسي الهابط. أيا كانت الأسباب فالنتيجة واحده انسف حمامك القديم ثم فليأتي أي رجل شريف بأي اتجاه يوقف البلد دي على رجلها حتى ينظف المسرح و حينها فقط نستطيع إن نسير في خطوات مفهومة و نعطي فرصة للجميع لإظهار كفاءتهم و نبطل نشوف مواقف نسأل بعدها الناس دي بتفكر ازاي كل ما نحتاجه رجل صريح و شريف يسرد لنا الوضع بشفافية ويشاركنا الرأي لنتحمل جميعا الموقف سويا 

عزيزي المجلس العسكري لن اجادل في حمايتك للثورة السابقة. شكرا يا فندم. بوسه كبيرة و حضن كبير. مع السلامة

لو كل واحد اختار حبيبه صح مكنش حد عرف يعني ايه حب أصلا. الدنيا فيها اختيارين واحد صح تعيشه وواجد غلط تقارن بيه عشان تحس بقيمة الصح. الفكرة في السعادة هي فكرة الترتيب. للأسف ربك بس هو اللي مرتيبها

خواطر مصرية

مشكلتنا كمصريين في اننا مش قادرين نفهم اننا فضلنا  30  سنه تحت مخطط لتفريق اصواتنا وتربية الشك  جوانا و الغاء مبدأ الحوار بيننا وكننا عايشين مغيبين بلا رأي أو فكر . كانت النتيجة بعد الثورة ان كل واحد فينا مقتنع تماما أنه صح و أي حد غيره بفكر مختلف غلط. لازم نحاول نستوعب وجهة نظر وظروف اللي قدامنا قبل مانحكم عليه. كمان لازم نفهم ان اختلاف وجهات النظر أو وجود اكتر من اتجاه و منهج حياة مش هيضرنا. إحنا معندناش مرجعية اختيارات لأننا مجربناش غير طريقة حياة واحدة كان مرفوض فيها حتى أننا نفكر هي صح ولا غلط. لازم نعيش كل التجارب عشان نعرف ايه أنسب تجربة لمصر. و راعي ديما ان زي مانت شايف نفسك صح طبقا لظروفك ومطلباتك اللي قدامك برده كده. الأكيد أنكم الاتنين بتحبو البلد دي ومش عايزين غير عيشة محترمة في بلد يحترمه العالم. خلونا نسمع بعض ومنشككش في نوايا بعض كلنا عيشنا وتربينا على أيادي نظام استعبد روح شعب كامل. مش يوم ما نرجع حقنا نثبتلهم ان تربيتهم نجحت وأننا هنكمل تشويه في البلد دي. الوقت دا مش محتاج اكتر من ان كل واحد يقوم بدوره في البلد دي زي ماهو مطلوب منه. أكيد ساعتها هنلاقي البلد حالها بقى أحسن كتيير. 

ولازم نفهم أن مش من حق أي حد أنه يفرض رأيه أو أسلوب تفكيره على غيره. لكن حق كل واحد فينا ان كل اللي حواليه يحترموا تفكيره ومنهجه في الحياة مادام لا يتعارض مع المصلحة العامة. محاولتك لفرض تفكيرك على اللي أدامك هي تفس طريقة هيمنة النظام السابق على تفكيرنا ومش هيوصلك في الآخر غير لرفض تام ليك و لكلامك حتى لو صح. تقدر تقول ان مصر كلها دلوقتي قافشة و مش هتيجي غير بالتفاهم والحوار و أي طريقة تانية هتكون مرفوضة وفاشلة 

كلنا مصريين.. وكلنا لسه بنتعلم يعني ايه حريه و كرامة.. خلونا نمشي اول خطوتين مع بعض بدل مانشك في حبنا للبلد دي  

و مازلت أنا هو أنا. تتغير المعطيات والنتيجة واحده فأنا من أبرهن ومن يقتنع بالخطوات و من يحكم ان النتيجة صحيحة فلماذا أعيش بمسلمات وضعها انسان آخر وفقا لمعطياته هو. ساخلق لنفسي مثلث حياة بأربعة أضلاع واجعل هذا أول مسلماتي. مثلت بأربعة أضلاع تلك هي حياتي

عايز تعيش صح. تخيل انك هتموت بكرة واعمل كل حاجة في يومك على الأساس ده قرب من ربنا والحق أعمل كل اللي بتحبه وكلم أي حد أنت متخاصم معاه وصالحه وقولوه واحشنى. خاللي بالك متسيبش حاجة لبكرة جايز جدا يكون النهارده آخر يوم بجد 

أنت اللي بترسم حياتك و ربك وحده بس عارف رسمتك أرسم خضار، أرسم بحار، أرسم قصور، ان شاء الله حتى ترسم صخور. بس وسط كل دا أوعى تنسى ضحكتك ،وتفرح ناس حبتك وعاشت مستنية تشوف رسمتك. أرسم حياة وأحلم ببكرة لسه أحلى ما في الرسمة ماجاش ولسه الحلم منتهاش

حياتك أشبه ما يكون بالساعة ومواقفها هي ساعاتها وتفكيرك في هذه المواقف هو عقاربها أعلم ان أول ساعة في التفكير هو قمة الخطأ وبمرور العقرب على الساعات تقل قيمة الخطأ ويزداد الصواب ولكن احذر ان تتأخر في تفكيرك حتى يصل العقرب لآخر ساعة في الصواب هنا تعود مرة أخرى للخطأ. ملخص الكلام آخر خطوات الخطأ هو بداية الصواب وآخر خطوات الصواب بداية للخطأ فكن وسطيا في كل تفكيرك لاتتعجل ولا تتأخر ..

لا يوجد شئ في الحياة يسمى الشخص المثالي تلك المثالية هي مجرد حجة تضعها لنفسك لتبرر عدم استطاعتك فعل المثل. أنا مثالي في عالمي لأني أفعل ما يجعلني استمتع بها. لا تقارن نفسك بأحد فربك خلقكم اثنان لو أراد صفات أحدكم هي السائدة لخلقكم شخصا واحدا فاشكر ربك على وجودك و كن أنت.

ترفًع عن مجادلة سفيها أخطئ في حقك فحتى نظرات الناس لك انك تنازلت عن حقك أفضل كثير من الهمزات واللمزات التى ستجناها من وراء المجادلة

the best motivation in the world is to learn how to motivate yourself to be ( yourself remembering ur ex yourself smiling and say thx GOD to be myself )

الجواز ما هو إلا مرحلة انتقالية بين أنت راجل برنس إلى عملت في نفسك كدا ليه ياأهبل. ففجأة يصبح البرنس أهبلا 

الفرق قبل الزواج وبعده : - الرجل قبل الزواج يأخذ مصروفه من أبوه وبعد الزواج يأخذه من المدام
- الهانم كده كده بتأخذ من كل اللي حواليها مضافا اليهم المسكين بعد الزواج

الحكيم ما هو اللا رجل استطاع ان يرتب أفكاره ويحكم على الأمور بموضوعية دون تدخل من مشاعره فصنع لنفسه كاريزما خاصة به.

عندما تبكي لظلم جاء بك تأكد ان دموعك على ربك غالية. فبكاء يعقوب أتى بيوسف ملكا.

I Quote

حياة..رسمة..بكرة ..أنا..حلوة..صعبة: كلمات تشكل دنيا أي واحد فينا. المهم نرتيبها صح.عن نفسي:أنا رسمة صعبة لحياة بكرة حلوة. أنت ايه؟

miss u :)

This distance is tearing me apart. 

I wish I knew the path to your heart. 

I'm so sick of feeling alone and sad. 

I hope everyday I won't be so bad. 

But all I remember when I wake, 

Is when you said this distance was fake. 

It was necessary, like taking it slow. 

Maybe it is, but it is hurting me so. 

You said it's harder for you than me, 

Oh if you could only see. 

I look like I'm dying, there's no life left. 

I try to deny it, but you've made the theft. 

My heart is yours, my life, my soul. 

I wish I knew if you're gonna fill this hole. 

You said don't be pessimistic, just hold on. 

But I can't help but think you're forever gone. 

Oh can't you see how this is killing me inside. 

It's like no other pain before, and I have to hide. 

I can't breakdown, I always have to lie. 

That there's no meaning behind every sigh. 

Everyday I have to pretend. 

That my thoughts aren't hard to fend. 

And as I sit here taking it, each and everyday, 

I await your answer and what you will say.

اصل انا و صاحبتي !!

مبدئيا أحب اوضح ان المقال دا يعبر عن رأي شخصي جدا بغض النظر هو صح ولا غلط..

اصل انا وصاحبتي كنااا.. مش عارف ليه اول مابسمع الجملة دي بتقفل من تكملة الكلام بحس انها جملة مش تبعنا كدا .. الغريبة ان معظم الشباب بيستخدموا اللفظ دا (صاحبتي) والمقصود بيها هنا البنت اللي هو مرتبط بيها .. كنا زمان – وزمان دا اللي هو من سنتين مثلا :D- بنقول كلمة صاحبتي دي على البنت اللي احنا ماشيين معاها لكن مفيش حب فالموضوع وهنا كانت الكلمة مقبولة.. لكن دلوقتي بقينا بنقولها على البنت اللي احنا مرتبطين بيها واللي ممكن تكون مراتك في يوم من الأيام.. لسبب ما بحس ان الكلمة دي بتقلل من قيمة البنت اللي بتتقال عليها مش عارف ليه بس هو انا اتربيت كدا .. المشكلة ان الجديد بقى ان البنت لما تيجي تتكلم عن الشخص اللي هي مرتبطة بيه بقت بتقول (صاحبي) طب و هو انا حدورلك على مصلحتك وانت يعني اللي مش عرفاها .. وأنا مالي صاحبتي صاحبتي .. مدام عجباكي خلاص..

خلونا فالمبدأ اصلا بقى .. هو صح اني ارتبط بولد من غير حاجة رسمي ونفضل فترة نتعرف على بعض وبعد كده نحب بعض ولو في نصيب يبقى في حاجة رسمي؟؟ طب ماهو ممكن يكون بيضحك عليا وبعد شوية يسيبني بعد ما كل الناس ما تعرف اني كنت (صاحبته) .. لأ الأول يبقى في حاجة رسمي وبعد كده اقرب منه.. طب يابنتي مانتي كده ممكن بعد ما الناس كلها ماتعرف انك اتخطبتي ماترتحيش معاه وتسيبوا بعض وساعتها برده الناس حتجيب في سيرتكم كتيير.. مش مهم بس ساعتها يبقى اسمى كنت مخطوبة و قدام الناس كلها .. هي وجهة نظر برده وتحترم بس هو المهم فالموضوع رأي الناس والناس حتقول ايه وخلاص؟؟!!

ايه المانع اني احب بس احافظ علي صورتي وشكلي قدام نفسي قبل ما ادور على شكلي قدام الناس؟؟.. ممكن تقربي من اللي تحسي انه يستاهلك وتحبوا بعض وتفهموا بعض بس من غير تنازلات.. يعني مش لازم حبنا يبقى مشاع للكل ومش لازم كل الناس تبقى عارفة لأن انتو مع بعض عشان تعيشو دنيتكو انتو الاتنين و بس مش عشان الناس تتفرج عليكم.. دا مش معناه اننا نعيش في رعب ان الناس تعرف لكن مجرد الحرص على المنظر العام والتعامل في حدود الاحترام والقواعد البسيطة اللي كلنا اتربينا عليها حيخلي الناس تحترمنا حتى لو عرفوا الموضوع .. ودا الفرق بين تعليق الناس على اتنين دول متصاحبين او الاتنين دول بيحبوا بعض.. اعتقد ان اي بنت حتحب تبقى في الاختيار التاني لأن حتى لو حصل والموضوع مكملش اسمك كنتي بتحبي فلان ودي كلمة متقللش من قيمتك في اي مكان..   نصيحة لكل بنت احكمي على الشاب اللي انت مرتبطة بيه بمفدار خوفه عليكي من كلمة او نظرة من الناس ممكن تجرحك ..اللي يقبل انه يحط البنت اللي معاه في موضع يخلي الناس يتكلموا عليها هو نفسه مش حيقبل انه يخليها ام عياله.. التنازل في الحب ممكن يكون في طلبات , في مستوى اجتماعي معين  لكن اساس الحب الحفاظ على المبادئ ودي مفيهاش تنازلات.. الفكرة مش في ارتباط رسمي  ولا صحوبية ولا حب , ساموها زي ماتسموها المهم نختار صح و نمشيها من الاول صح عشان منديش حاجة لحد ميستهلهاش .. الحب مش منظرة قدام الناس , الحب دا دنيا جديدة بيبنيها ويعيش فيها اتنين بعيد عن كل الناس المهم يكونوا مرتاحين فيها  ومحافظين فبها على بعض ......

كتابات قديمة تعليقا على اقتحام سفارة اسرائيل

في اي مليونية من مليونيات الغضب عند حدوث أي شغب يكون أول تعليق نسمعه ( دول مش الثوار دول بلطجية الداخلية ) .. هذا يعتمد على مفهوم كلمة الثوار بالنسبة لك.. هل هم فقط من يثوروا طلبا للحقوق مع مراعاة القواعد والأصول؟؟.. للأسف هذا المعنى غير موجود عند فئة من فئات الشعب وهي الفئة التى تبرت في معاناة وقمع وتحت ظروف خلقت منهم اشخاص لا يعترفون إلا بمبدأ القوة والهمجية للحصول على حقوقهم.. هؤلاء كنا نراهم قبل الثورة في الخلافات داخل السوق اة في المواقف العامة اوحتى في الشوارع تجدهم يخربون بلا هدف او معنى لدرجة ان الشخص منهم لو كان له حق اضاعه بطريقة التعامل مع الموقف..

لا نستطيع اللوم على هذه الفئة فنظام مبارك البائد كان يعملهم انهم نكرة لا وجود لهم و ان اهانتهم شئ طبيعي داخل الاقسام و امن الدولة ليخرجوا بعد ذلك ناقمين على كل ما حولهم مفرغين هذه الاهانة في عوام الناس.. لا نتوقع منهم ان يصبحوا فجأة واعيين ومدركين ان كل هذا انتهى ونطلب منهم ان ينسوا كل ما عانوه ويجب ان نتفهم ان هؤلاء داخلهم غل وشحنة سلبية تضاعفت مع غياب كرباج الظلم الذي طالما كانوا يخشوه ويجب ان نصبر على هؤلاء حتى يعتادوا الموقف الجديد.. مغزى الكلام أن حادث مثل الاعتداء على مبنى الداخلية ليس بالضرورة ان يكون القائم به بلطجية الداخلية وغنما من الممكن ان يكونوا هؤلاء ممن تحدثنا عنهم والذين يخربون لمبدأ التخريب وليس اكثر..

في نفس الوقت نجد ان الشرطة ايضا ما زالوا لم يستوعبوا ان العصر الفاسد انتهى وانهم يجب عليهم ان يدركوا ان هناك عصر جديد من العدالة والحياة النظيفة قد بدأ.. بالعكس نجدهم يعاملونا مبدأ ( لوي الدراع)  نفس الاسلوب الذي اتبعوه أول ايام الثورة وكانهم يقولون لنا ( مش انتو شايفنا وحشيين طيب احموا نفسكم انتوا بقى) لكن هذه المرة دبروها بذكاء حيث اعلنوا الامس انهم لن يتدخلوا اليوم باي شكل من الاشكال وهم واثقيين تماما ان مثل هذا التصريح سوف يداعب الهمجية الساكنة داخل نفوس من تحدثنا عنهم لنجدهم اليوم بين الثوار المحافظين.. نحن لا نستطيع ان نشكك في حبهم لوطننا ولكنهم لا يستطيعون توظيف هذا الحب بالشكل الصحيح..

نفس اسلوب الالهاء القديم نجد الهمج يحرقون مبنى الداخلية فيسرع باقي الثوار لتهدئتهم والدفاع عن شرعية اليوم والثورة متخلين عن مطالب المليونية الاساسية .. الموضوع اشبه بانك دخلت وزميل لك تطلبون حق لكم من مديركم فتطاول عليه زميلك بالضرب فبدأت ان تدافع عن المدير ليس خوفا عليه ولكن لانك تعرف الاصول جيدا.. وطبعا م ان ينهي الموقف لتجد مديرك يبكي وتجلس انت متعاطفا معه ناسيا ما كنت تريد طلبه..

اختلفت السلطة هذه المرة مع نظام مبارك في انها كانت اذكى فبدلا من تكبد مشقة البلطجية المؤجورين اكتفوا بتحضير روح الهمجية وجلست تتابع الاحداث بهدوء.. ولكنهم نسوا ان يحترموا عقلية الشعب الذي تربى على دهاء مبارك وفهموا جميع الاعيبه التى ورثها لنا طيلة 30 عاما كما ورثها لهم تماما وحتى الان هم ليسوا قدرين على استيعاب المثل الشهير ( مبروم على مبروم ميلفش)

هم الان سيحاولون ان يستدرجونا –كما فعل المدير- لنتعاطف معهم و الاحرى بهم ان يستدرجونا لاحترامهم والثقة بهم بعدم الالتفاف حول رغباتنا واحترامنا كشعب ارهقنا النظام الفاسد ولنا الحق ان نعيش الان مرفوعي الرأس..

إن كنا سنتعاطف معكم يا داخلية العادلي فأولى بنا ان نتعاطف مع من نقول عنهم همج لان لهم المبرر الذي جعلهم كذلك من قهر و اهانة ومعاملة سيئة طيلة ثلاثين عاما.. نحن نشفق عليكم لانكم حتى الان لم تستوعبوا ان عصر العادلي انتهى بكل ما فيه من ظلم وتعالي و ربَى فيكم روح الكبر والغرور حتى نسيتم انكم من تخدموا هذا البلد وليس العكس

كفانا مهاترات وحركات صبيانية والتفاف حول إرادتنا .. ولتراعوا الله في هذا الوطن وفينا ...

حكايتنا خلصت

النهارده خلصت ما بنا الحكاية 

هصحى بكرة افتكر كل الرواية 

يوم ماجتلك اطلب قرب معاليكي 

ويوم ما عشقك كان كل املي ودوايا 

يوم بعادنا سألتي زعلان مني؟ عادي مش فارق معايا 

حتفرق ايه وانتي اصلا مش معايا 

ناديت كتير ممكن تحسي بهوايا؟ 

قصة هوانا اللي خوفك كان هو قاضيها 

قاضي ظالم ضيع أجمل ما فيها 

كنت راسم لبكرة رسمة كل اللي عايزه تشوفيها 

رسمة ايه ؟ اللي بايديك شخبطتي عليها 

النهارده حلمي في نومي حيبقى كله عنك 

بس بكرة وعد مني لما اشوفك حضحك في وشك 

و عادي جدا نمسح الرسمة ونكتب احلى تمثلية 

تمثلية حب نهايته كانت قبل البداية 

بس وعد يوم ما تبكي على حبي اللي ضاع 

يومها ماحتلاقي مني غير بس كلمة وداع 

شايفك بتضحك مش مصدق قسوتي 

وعارف انك يوم ماترجع حتلاقيني قاعد بلون رسمتى 

ومستنيك عشان تيجي وترجع بسمتي 

اصل حبك غصب عني مش بايدي يا ملاك

انا الغلطان

 وقابل حد يسألني سبتوا بعض ليه؟ 

أضحك وأقولها في سيري هي اخرة الحلم دا ايه، 
مش حصحى وأكلم حبيبي وأحكيلو حلمت بأيه، 
قابلت حبيبي في حلمي سألته مكشر ليه؟ 
قاللي وأنت ليه بتسأل حتفرق معاك في ايه؟ 
دنا كل مقابل حد يقوللي خلاص أنت هنت عليه، 
بنسأله سابك ليه؟ بيضحك و الفرحة مش سيعاه، 
اتاري الحلم ماهواش حلم و ضحكتي أتفهمت بنسياه،
اعيش ازاي في بعدك و تسوى ايه الحياه؟؟

لحظة هو انتي بتحاسبيني؟؟!! مين فينا اللي غلطان

 ايوة انا الغلطان في حبك لما اديتك امان

امنتك على ضعفي لعبتي بيا نشان

ويوم ما نشانك خاب طلعتيني انا التلفان

انا اللي هنت نفسي ودمعي عليكي هان

و بقيت فرجة ناسك  يشاوروا على الولهان

ناسك اللي حكولك عني مشفوش غير ضحكتى ؟؟!!

مصعبتش عليهم لما شافوا نظرتي؟؟

نظرة متيم بحبك  وانا مجبر على وحدتي

نهيتي بايدك قصة وشكرا على حريتي

انا مش هبكي عليكي انت ارخص من دمعتي

بتضحكي؟؟ لأ دي مش دموعي

ارجوكي ارحميني وحسسي بقلبي بين ضلوعي

معرفتش غير اكون عشانك وانت  مكنتيش عشاني

سيبني وامشي وانا هاكتفي بملكة في  احلامي

 النهارده اخر ما بينا هسيبك واقولك يلا سلام

النهارده اخر ما بينا هسيبك واقولك يلا سلام

وان في يوم اتقابلنا حعمل نسيتني  الايام

سلام

في انتظار الرد !!

الايام عدت  والرد ماجاش .. بس عارفة تخيلت انك لو كنت رديتي كان هيكون دا الرد J

ازيك عامل ايه؟ قريت انا كلامك الاخير افتكر كان اسم النوت (ازعل يا قلبي ) صح؟

كلامها حلو بس هو انت ليه عايش دور الشهيد المظلوم اللي مبيغلطش وليه بدل متسألني ازاي مش حاسًه بقيمتي عندك تسأل نفسك الاول هو انت عملت اللي يخليني احس بحبك؟

فاكر يوم ما جيت قولتلي بحبك فهمتك اني بخاف من كل الناس وبخاف من الارتباط يومها انت وعدتني انك حطمني  وتخليني اسعد واحده في الدنيا.. انا مش ذنبي اني بخاف بس انت ذنبك انك وعدتيني و خلتني اطمنلك وبعد كده سبتني لخوفي يكبر جوايا وانت مش قادر تفهم وتقَدر اني بكون محتجالك جنبي عشان اطمن بيك و اتأكد اني اخترت صح..

لما قولتلك انت قلت كلام عني لفلانة ولو اتأكدت من ده انا عمري ماهكلمك مكنش قصدي اهددك انا قلت كده من ضعفي لأن مكنش في ايدي حاجة تانيه اعملها غير كده .. انا من جوايا كنت متأكده ان عمرك ماهتعمل كده فيا بس غصب عني خوفي سيطر عليا واكتشفت ساعتها انب بخاف منك تجرحني اكتر من خوفي من اي حد تاني لأنك بالنسبة ليا كل حاجة وانت اللي المفروض تقف جنبي لما حد يغلط فيا .. طب لو انت اللي غلطت مين حيقف جنبي؟؟

ظروفك ممكن عقلي يقدرها لكن قلبي الخايف ميقدرش يفهمها . كل اللي حسيتو منك اني حد انت بترتاح معاه و عايزه جنبك لكن مش حد مستعد تبيع الدنيا عشانه و ده اللي كنت عايزه احسه عشان اعرف قيمتي عندك واتأكدمن حبك ليا..

اما بالنسبة لنوت ( حكايتنا خلصت ) شكرا اوي على انك شايفني كده بس عايزه اقولك حاجة حكايتنا خلصت بالكلام لكن جوايا كلام كتير نفسي اقوله بس برده خايفه مش عايزه ازعل منك اوي اكتر من كده لما اجي اتكلم معاك وتقولي مبررات لحاجات انت عملتاها ملهاش اي سبب..بس اطمن انا ببررلك كل اللي عملته معايا عشان انا نفسي تكون احسن واحد في الدنيا على الاقل قدامي..

انت محبتنيش و اكبر دليل على كده انك عايش حياتك عادي ومبسوط وانا نش فيها اكنك مصدقت اني قلتلك خلاص كفاية.. مش ممكن اكون قلت كده عشان خايفه ؟؟ او عشان تثبتلي اني غلط وانك بتحبني ؟

فاكر لما قلتلي اغلطي براحتك و متتأسفيش وانا هصلح وراكي.. مش دا كلامك ؟ طيب اديني غلط وملقيتكش جنبي ومصلحتش ورايا حاجة.. شفت بقى انك محبتنيش .. انا عمري ماهقولك تعمل ايه او متعملش ايه بس اللي بيحب حد بيحافظ عليه .. انا ممكن اكون ظلمتك كتير بس كان لازم تفهم ان ده من خوفي مش من قوتي زي مانت فاهم انا ساعات كتير كنت بخاف تحس اني اتعلقت بيك اوي فكنت بقسى عليك مكنش من حقك لما اعمل كده تسيبني وتقول لقلبك يزعل مني .. انا مش عارفة انا بكتبلك الكلام ده ليه بس انا زعلانة منك اوي عشان انت سمعت كلامي لما قلتلك ابعد عني و على فكرة بقى انت ولا ذكي ولا حاجة زي مانت فرحان بنفسك .. انت اغبى واحد انا شفته في حياتي.. سلام ولو سمحت متردش على الكلام دا و متكتبش حاجة مستفزة ولا اقلك براحتك يعني اعمل اللي انت عايزه انت حر

ازعل يا قلبي

زمان وأنا صغير كنت لما اعمل حاجة غلط في أمي – إني اعالي صوتي عليها مثلا- كنت الاقيها بعد شوية قاعدة بتعيط اروح اصالحها وسألها بتعيطي ليه تقولي عشان مهما غلطت فيا قلبي مش بيعرف يغضب عليك وانت حته منه وخايفة لما تكبر تقسى عليا وبرده قلبي ميعرفش يزعل منك واحس انك مش عايزني في حياتك.. كنت دايما فالموقف دا بسأل نفسي سؤالين الأول (يعني ايه قلبها مش عارف يغضب؟؟) واحد غلط فيا حتى لو ابني وانا متأكده انه بيحبني بس غلط فيا اكيد قلبي حيزعل منه.. السؤال الثاني ( هو انا ممكن يوم مكنش عايز امي في حياتي؟) طبعا مستحيل هي ازاي فكرت في كدا اصلا..

دارت الأيام وحصل الموقف دا معايا .. و اد ايه انا استغربت نفسي فيه.. واحده انا بحبها جدا وهي اقرب الناس لقلبي بس هي مشكلتها انها بتخاف من الناس اوي لدرجة انها من كتر خوفها بتسئ الظن بالناس في حاجات كتيير يعني ممكن مثلا تقول لواحد ازيك وهو واقف بضهره ميردش .. فتتخيل بقى انه كان واقف مع واحده تانية اقربله منها فعشان كده عمل نفسه مش سامع فمردش عليها!!! طب هو حضرتك مش ممكن – ودا الاوقع – انه يكون مسمعش؟؟ تقولك لأ ماهو قاللي انه بيعمل كده مع فلان.. طب ماهو مدام حكالك انه عمل كده مع فلان تبفي انت قريبة منه جدا انه عمره ما هيعمل كده معاكي مكنش حكالك .. ودي مشكلتها التانيه مع خوفها من الناس انها مش بتقدر تحكم على مكانتها في قلب اللي قدامها وتقَدر حبه ليها وبالتالي بتتعامل معاه بناءا على اللي هي فاهماه فبيكون اقل كتيييير من اللي جواه و اكيد دي حاجة توجع اي حد انك تبقى مثلا من كتر حبك في حد ممكن تبيع نفسك عشانه.. ويجي مثلا يقولك اصل انت قلت لفلان اني قلت عليه كذا وانا قلتلك متقولوش؟؟!!.. بينك وبين نفسك تبقى بتقول ايه الهبل دا انا عمري اصلا ماقدر اخلِي حاجة تضرك , اقوم انا اللي اعمل كده بايدي؟؟! وقد ايه  بتحس انك بتموت من جواك و انك قليل الحيلة في انك تثبتلوا انك عمرك ماتعمل كده لأن دي حاجة بالاحساس ملهاش دليل مادي.. طب ازاي انت ممكن تصدقي اني ممكن اعمل حاجة تزعلك ؟؟ هو انت مش عارفة انا بحبك ازااي؟ وتلاقيها بتقول انا لو اتأكدت إنك قلت انا عمري ماحكلمك او اعرفك تاني!! الكلام دا ليا انا؟؟ هو انا كمان قليل عندك أوي كده إنك ممكن في موقف تنسي كل اللي بينا -حتى لو انا غلطان يعني-؟؟ هي دي قيمتي جواكي؟؟ طب اتخانقي او اتخاصمي لكن مش هعرفك تاني؟!! وساعتها تكتشف ان هي جواك حاجة كبيرة اوي .. بس انت جواها حاجة عادية لو خصل في يوم انك غلطت حطلعك من جواها بمنتهى البساطة!! هنا افتكرت أمي في السؤال التاني ( هو انا ممكن اكون بحبها اوي كدا وتبقى هي من جواها عادي وممكن تتخلى عن وجودي في حياتها بسهولة؟ تتخلى عني انا اللي ممكن اوقف حياتي كلها عشان لحظة هي تعيشها مبسوطة؟؟!)

عارفين اكتر حاجة وجعتني ايه مش انها قالتلي الكلام دا.. ولا حتى اننا لما اتناقشنا مدتنيش حق اني ازعل من عدم ثقتها في اني عمري ماعرف اضرها.. ولا انها عمرها ماحست هي مهمة جوايا قد ايه وعمرها ماحترمت مقدار حبي ليها.. ولا حتى انها مش شايفة انها غلطت في حقى وجرحتني بكلامها.. اكتر حاجة وجعتني ان فلبي مقدرش يزعل منها !!!! مقدرش يزعل من اكتر واحده مفدرتش حبي ليها .. اكتر واحده خلتني اصغر  قدام نفسي.. انا اللي عمري ماسكت على حقي او ضعفت قدام حد.. كنت بسكت وهي بتيجي عليا بحكمها على مواقف غلط وعدم تقديرها لحبي وسوء نيتها فيا.. واتفهم سكوتي انه ضعف مني او عشان الحق عندها .. انا اللي كنت بحلم بس تحسي انتي ايه بالنسبة ليا وكنت في كل موقف بتيجي عليا واجي انا في اخر تفكيرك .. ممكن تزعليني عشان غير ميزعلش وممكن تخسريني عشان حد لكن لو حد غلط فيا نزعقله بس منخاصمش؟؟!! انا اللي كلي غلط مابنكرش بس غلطي كان بيجي عندك ويكش .. ازاي هنت عليكي كدا؟؟ وازاي يا قلبي متزعلش منها ؟؟ انا بموت من جوايا وانت مش قادر تزعل؟؟ .. افتكرت هنا كلمة أمي زمان ( قلبي مش قادر يغضب عليك وانت حته منه )

اكيد انتي برده بتحبيني زي مانا كنت باحب امي .. اكيد انتي بس اللي مش عارفة توصليلي حبك.. انا برده كنت كده زمان على فكرة كنت بتريق على اي لما تقولي انت مش عايزني في حياتك ومش بتحبيني.. اكيد لما حتقري الكلام دا حتضحكي علىا وتقولي ايه الهبل دا ازاي فاكرني مش حاسه بيه .. صح اكيد انتي حتعملي كده؟؟ بس حتى لو معملتيش كدا انا عارف انه مش قصدك وانك في يوم حتفهميني ......

كتابات يناير .. طفرة التحرير

في وجهة نظري التغيير اللي حصل في موقفي دا عبارة عن طفرة غير مفهومة في شخصية واحد مصري بمعنى الكلمة .. عشت حياتي كلها متخيل إن أبويا هو اللي رباني وعلمني الطريقة اللي أنا عايش بيها دلوقتي بس مؤخرا فهمت إن اللي رباني أنا و أبويا بابا حسني.. ربانا علسلبية وإننا نشوف الغلط ونعمل من بنها .. وكل منشوف فلوسنا بتتسرق نقول واحنا مالنا هي دي بلدنا دي بلد الناس اللي فوق والكلام اللي كل واحد فينا بلا استثناء بيقولو فاليوم مليون مرة و دا اثبات أن بابا هو مبارك مش بابا اللي قاعد معاك فالبيت وسبحان الله تربيته نفعت فينا كلنا على عكس تربية أبوك الحقيقي....

لو رجعنا ليوم 25 يناير .. حنلاقي نفسنا كمصريين فكرنا زي ما بابا حسني ماعلمنا..

أول يوم اتفرجنا كلنا على التلفزيون وقعدنا نتريق علعيال العبيطة اللي بتقلد تونس .. و نقول هما فاكرين نفسهم في تونس دحنا في مصر دلوقتي بابا حيكلم عمو حبيب العادلي حينزل يضربهم ويرواحو .. واللي يقولك دي عيل عبيطة وبيقلدو وماحنا طول عمرنا عايشين كدا ايه اللي تغير يعني وكأنك يا مصري كنت عايش قبل كدا أصلا .. وخلص أول يوم وقلنا اهم عيال زعلانين من بابا وخلاص .. مصري مصري يعني!!

بدأ بعد كدا الموضوع يكبر و بدأت تحس ان اخوك من مصر اللي هو من أب تاني غير مبارك بيحاول ياخد حقه عشان بابا وحش معاه.. وانت كنت ساكت وبتتفرج عشان شايف إن ليه حق والمفروض ياخده .. وفضلنا كلنا بنتفرج وحبه مننا وكنت انا منهم قولنا نساعدهم عشان ياخدو حقهم ماهم اخواتنا بردو.. بس سيبك انت بينك و بين نفسك عارف كدا كدا انت معاك مصروفك فمش فرقا معاك اللي بيحصل اديك زايط وخلاص.. بس خد بالك بابا بدأيزعل منك اليوم دا !!

اللي حصل بقى بعد كدا اثبت بصراحة لامؤخذه يعني ان بابا سيادتك ابن كلب .. اخدك على جنب و قعد يعيط ويقولك يبني انت بس ضنايا.. الواد التاني دا انا معرفوش دا عيل واطي انا بابا يا حبيبي يرضيك تعمل كدا في بابا!! تقوم انت طبعا عامل سبعين راجل في بعض و تقوم قايم على أخوك هارسه ضرب وشتيمة وقلة أدب.. لحد هنا حقك دا أبوووك يابني...

عارف المصيبة طلعت فين بقى يا حمار .. ان طلعت فالاخر انت اللي مش ابنه ولا حتى ابن مصر وطلع المسكين التاني هو اللي ابنه بس للاسف ابوه ميعرفش يربيه و يزرع فيه الخوف والسلبيه اللي فيك طبعا ماهو جيبك من الشارع..

كلنا كنا بنشوف اعيال اللي اخدو فلوس عشان يهجموا علتحرير وغيرهم اللي كنا بنوقف تحت بيوتنا نحمي نفسنا منهم.. انت متخيل يعني ايه واحد يبقى عارف انه حيجي يضربلو طلقتين فالهوا والناس حتمسكوا تعجنوا ويرضى يجي عشان حياخد 100 جنيه!! واحد من كتر جوعه و فقره بيبيع نفسه ب 100 جنيه.. هو دا اللي النظام عملوا فينا .. ويقولك بابا حسني وهو في اب يسيب ابنه جعان لحد مايقوم يهجم على اخوه عشان ياكل.. هي دي مصر؟؟

لكل واحد قرا ( موقف غير حياتي.. أنا اسف يا مصر ) بمقارنة بسيطة بين الرجل العجوز اللي نفسه يعيش يوم واحد وهو انسان, ومبارك اللي فاكر نفسه مش حيموت وبيفكر فالخروج الاّمن .. لو حختار أبويا يبقى حختار الراجل العجوز وهي دي الطفرة أنك تكتشف إن بابا مش بابا... أنا اسف يا مبارك بس لو أنت ابويا فاعتبر نفسك معرفتش تربي .... معادنا  فالتحرير و أوعدك حفرحك بولادك وهما بيخدوا حقهم.. 

كتابات يناير.. اول يوم ثورة

حابدأ كلامي بأنا مين.. أنا واحد طالب في اخر سنة في كلية طب اللي هيا المفروض كلية قمة عشت اخر سنين في حياتي بلعن اليوم اللي دخلت فيه الكلية دي لأسباب كتير أولها إني لحد دلوقتي مبعرفش ادي حد حقنة و اخرها نتيجة النظام الروتيني الغبي فالتعليم.. من 4 سنين قررت اني اغير نظام حياتي واعمل حاجة مفيدة فقررت اعمل مشروع وفتحت كافيه صغير كده...

المهم نيجي لحكايتنا واللي هيا نصفين.. النصف الأول بيبدأ بموقف......

من أول الثورة كنت زي أي شاب في نفس مستوايا الاجتماعي مبسوط بالتغيير اللي هو انا اساسا مش عارف هو تغيير لايه.. أنا واحد اتربيت في مستوى كويس الحمد لله ..أبويا رباني إن أي حاجة بطلوبها بتيجي ومعرفش بتيجي ازاي أو منين لما كبرت وطلباتي بتزيد ومعظمها كانت مجابة .. ممكن واحد مسكين يصعب عليا ولا حاجة اديلو قرشين ولا اقول يا حرام.. فلما جات الثورة كنت متخيل إنها مش حتفرق معايا يعني أنا عايش كويس الحمد لله بس مكنش عندي مانع إن الناس اللي تحت تطلع فوق شوية ززبس لما الموضوع بدأ يطول وبدأ الناس نزهق وبدأالكافيه عندي ميجيش ناس كتير وبدأ العمال عندي يطلبوا فلوس وانا مبكسبش و يومها طلع الريس حسني مبارك بخطابه الرهيب الجامد جدا .. بدأت أقول كفاية كدا ما الراجل زي الفل واديلو فرصة و أصل الدستور و أصل المجلس وأصل و أصل... صحينا تاني يوم على قتل و خراب و فساد مبقتش فاهم حاجة ومبقتش عارف أنا مع ولا ضد.. بس بردو على بليل روحت الكافيه ملقتش ناس لعنت الثورة من أولها لاخرها..

النهارده كنت قاعد على قهوة جنب البيت لاقيت راجل عجوز قاعد بياكل عيش و جبنة وبيعيط فشديت كرسي وقعدت جنبه سألته مالك يا حج.. الأول مرداش يرد عليا بعد كده قالي أنا زعلان على نفسي انا بقى عندي 65 سنة بس مبقتش راجل . حياتي ( والكلام للرجل مش كلامي) خلصت وانا معدوم الكرامة.. ماشي جنب الحيط وكله بيديني على قفايا واقول معلش.. عشت مرعوب من بكره ومرعوب من السلطه ومرعوب من كل حاجة.. أنا كنت موظف في المحافظة شايف كل اللي فوق بياخدو فلوس ملهاش أول من اخر وانا مش عارف اجيب جزمتين لولادي فكنت بجبلهم جزمة واحده وكل واحد يلبسها يوم .. في نفس الوقت اللي كان ابن رئيس المصلحة بتجيلو كسوة فالصيف و كسوة فالشتا من فلوس الحكومة.. أنا عشت موطي رأسي عشان خايف يجي يوم معرفش أجيب أكل لبيتي لحد مبقيت عامل زي الحيوانات.. أنا زعلان أني مش حلحق أعيش الأيام الجايه وأشوف مصر بتاعة زمان تاني.. انا لما قلبي تعب كل اللي عرفو يعملوه انهم طلعوني معاش عشان مش عارف اخدم.. طلعت و انا معيش تمن علاجي .. انا نفسي ارجع انسان تاني بس شكلي مش حلحق يا رب ولادي يرفعوا راسهم وميوطوش زي ابوهوم وبدأ يعيط تاني.. هنا خلص الكلام وكالعادة قولت يا حرام وخلااااااااااص

بعد ما سبت الراجل ومشيت فكرت انا ليه سلبى كدا وليه كل اللي اعرفهم بنكتفي اننا نعود ونتكلم عن الولاد الهبلة اللي فالتحرير وانهم مش حيوصلوا لحاجة.. وبعدين وصلت لحاجة وصلت ان ابويا رباني كويس وصرف عليا وعماللي كل حاجة بس رباني زي الراجل العجوز اني امشي جنب الحيط وانني ماليش دعوى بحد ولو حد ظلمك قول حسبي الله ونعم الوكيل.. أنا عايش اه بس من غير كرامة وحتى معرفش يعني ايه كرامة.. عشت في بعبع حاصرف منين واشتغل ازاي واجيب عربية منين وادفع فاتورة موبايلي لكن متعلمتش ازاي ارفع راسي ومخافش من حد.. النهارده اكتشفت اني انسان بلا كرامة وبلا مبادئ ..لكل أهالينا شكرا انكم ربتونا بس انتو خوفتو تواجهو نفسكم انكم مش عايشين واحنا طلعنا زيكم ومحبش ولاددي يطلعو زيي .. ولا فيها صبر ولا نديهم فرصة انا قررت ادافع عن كرامتي وعن اهلي و اخد حقي من كل واحد سرق مني دنيتي وحياتي.. انا بندم على كل كلمة قلتها في حق شباب التحرير ومن دلوقتي أنا معاكم عشان مبقاش زي الراجل العجوز.. يمكن تقروا الكلام ده وتضحكوا عليه بس أنا وصلت لمرحلة يا قاتل يا مقتول ولو عشنا سنة في جحيم عشان نكمل حياتنا واحنا رافعين راسنا فالموضوع يستحق.. انا اسف يا مصر بس انا مش ابنك لحد متستحقي تكوني أمي ........أنا رايح التحرير ومش ماشي غير لما اجيب حق الراجل العجوز واخليه يعيش ولو يوم واحد وهو انسااااااااااااان ..