بلدنا دي بلد غريبة جدا .. عشان تاخد حاجة لازم تسيب حاجة.. وحتى لما تقرر هتختار ايه فلازم برده تتنازل عشان تنفذ اختيارك, والتنازلات في بلدنا بتبدأ من و أنت طفل ييجي أهلك يدخلوك مدرسة فيبقى في اختيارين ياأما مدرسة لغات على أحسن مستوى تعليم وفلوس كتير طبعا واخر حاجة طبعا هناك التربية , أو انهم يدخلوك مدرسة عادية بتعليم متوسط وتربية كويسة.. طب هو مينفعش يبقى في مدرسة فيها الحاجتين ؟؟ مينفعش يا بيه انت في مصر!!
مرورا بقى بسلسلة من التنازلات زي مرحلة ثانوية عامة علمي ولا أدبي دي مش مضمون و صعب ودا سهل ومالوش مستقبل اوي.. تعالى بقى على دخول الكلية ونظرية كل المصريين ابن الدكتور لازم يبقى دكتور و ابن الضابط لازم يطلع ضابط وهنا تنهار كل اختياراتك وتبدأ في سلسلة من التنازلات عن طموحاتك اللي فضلت طول عمرك تحلم بيها .. طب هو انا عشان ابويا دكتور شاطر لازم اطله انا كمان دكتور ؟؟ لأ ويقولك عندك اختيارات كتيير يبني انت من المتفوقين اصلا.. اصلا يا حسرتي !!
طيب انا خلصت كلية هعمل ايه بقى؟؟ اشتغل بشهادتي اللي اصلا انا مش حاببها بس اهي شغلانة مضمونة وتسلسل وظيفي معروف فيه بعد عشرين سنة حتكون فين.. ولا اشتغل الحاجة اللي انا بحبها و رزقي على الله؟ انت اهبل يابني خليك في المضمون وامشي جنب الحيط مفيش حاجة مضمونة فالبلد دي غير الشغل ابو مرتب ثابت دا وملكش دعوى بقى صاحب الشغل بيكسب ولا بيخسر انت تاخد مرتبك وخلاص, لكن حتقوللي بقى بيزنس وانا دماغي نضيفة و بحب اشتغل مش عارف ايه .. افهم بفى الكلام دا ميأكلش عيش انت في مصر يابني!!
ايه علاقة مصر بالموضوع دا مش عارف انا والله , قعدت افكر كتيير يمكن دي جينات مصرية انك لازم تتنازل و وتعمل نفسك بتختار وهو مفيش اختيارات اصلا .. في الاخر وصلت للحل دي مشكلة تربية يا بيه ..للأسف شيئنا أم أبينا احنا تربية حسني مبارك , متقولش ايه الهبل دا عشان مبارك دا بابا يا حبيبي حتى لو مش عجبك وبتحاكموا عشان هو وحش بس انت طلعت ملقتش غيره في الدنيا وهو اللي ربانا اننا نختار زيه بضبط ابتداءا من الاستفتاء ابو 99.99% و مجلس الشعب بتاع الموافق يرفع يده وحتى بعد ما مشي من كتر خوفنا واننا لازم نمشي جنب الحيطة وعشان الاستقرار قولنا نعم للتعديلات الدستورية و اخيرا انتخابات الرياسة اللي بنحمد ربنا إن مبارك منزلش فيها عشان كان هيكسب غالبا بنفس النسبة إياها , هي التربية الغلط اللي عملت فينا كده.. طيب وبعدين؟
في وجهة نظري ان كل حاجة عملناها في الحياة السياسية – اللي هي اكبر مثال علي تربية النظام السابق- من مبدأ امشي جنب الحيط واختار زي الناس ومتفكرش كتيير طلعت غلط فالاخر سواء بقى الاستفتاء او مجلس الشعب او حتى انتخابات الرياسة الاخيرة . يبقى اكيد المبدأ دا غلط ولازم يتغير في كل حاجة .. مشكلتنا كمصريين اننا وعلى رأي النكتة الشهيرة حافظين مش فاهمين.. افهم دنيتك كويس وادرس كل الاختيارات .. متقدمش تنازلات ..حافظ على مبادئك وأمنياتك وطموحاتك.. اختيارات الحياة مش ثابتة لكل الناس ومش مسلمات مكانش بقى اسمها اختيارات..كمان مش معنى انك اخترت يمين وانا اخترت شمال يبقى واحد فينا غلط المهم تختار اللي يناسبك وتحس فيه انك اتحركت بيه خطوة في حلمك اللي برده ممكن لحد غيرك يكون حاجة سهلة وعادية.. مش مهم تبقى احسن واحد في الدنيا المهم تكون مميز في الحاجة اللي انت اخترتها ..ارجوك احلم..اختار.. اعدل حياتك..