كل حكاية حب بتبدأ بكلمة بحبك و ديما بتبقى الاختلافات في النهاية .. اعتقد ان النهايات برده واحده .. # وجهة نظر..
كان اسمه أحمد , و هي هبه ..
بدأت الحدوتة زي كل حواديتنا اتنين زملاء في الكلية و بعدين بقوا اصحاب و هو بحكم شخصيته بقى حد مهم في حياتها , و هي بحكم ذكائها واللي كان احمد بيقدسوا في اي بنت بقيت من اقرب الناس ليه .. طول عمره كان بيحلم يرتبط ببنت ذكيه يعرف يتناقش معاها و تفهموا من غير ما يتكلم و تقدر بساطته.. بمرور الوقت بدأ احمد يتعلق بهبه جدا و كانت مشكلته معاها انه كان بيحكلها على كل ماضيه و كل مواقفه و غلطاته و كان ديما يقولها انت فاهمة ان الموقف الفلاني مع الشخصية الفلانية ده انا مكنش قصدي فيه كده و انه اتفهم غلط.. بساطة تفكيره وعدم التركيز في الكلام مع تركيز الناس الزايد مع الكلام خصوصا انهم كانوا بيركزوا معاه اكتر بحكم شخصيته الغامضة بالنسبة لهم كانت اساس مشاكله في الحياة.. و كانت ديما هي تقوله انها فاهماه و مقدره اسلوبه.. و ده كان بيخليه يتعلق بيها اكتر , اخيرا لقى حد ياخدها ببساطة معاه .. المهم راح قالها انا بحبك و مشيوا في الطريق اللي كلنا بنمشي فيه هي تقوله انت حد مهم بالنسبة لي بس ممكن يكون اننا متعودين على بعض و هو يشك ان الموضوع ممكن يكون تعود فعلا.. و شوية شوية يلاقوا نفسهم في جوا بعض.. طبيعي كلنا بيحصل معانا كده
بعد ارتباطهم بدأت المشكلة اللي عمر احمد ما تخيلها .. انك تحكي لصاحبتك غير انك تحكي لحبيبتك , و ان صاحبتك بتحلل الكلام بطريقة مختلفة تماما عن حبيبتك.. بدأت مواقف مثلا انه ميكلمهاش 4 ساعات عشان مشغول فتزعل ,يفهمها انه كان مشغول , تقوله انت زمان قلتيلي انك لما كنت بتعمل كده مع حبيبتك القديمة كنت عشان بتكون زهقان منها!!! هنا بدأت المشاكل انه كان بيحكلها كل حاجة و فجأة بقيت هي فاكرة في كل الحكاوي النصف الخاص بالموقف و نسيت تماما النصف الخاص بتبريره هو للموقف وانه مكنش قصده حاجة.. و فجأة تانية بدأت شخصيتها تظهر في تحليل حاجات هو بيعملها من وجهة نظرها و تفكيرها .. و بدأت المشاكل في التشكيك في حبه ليها .. و طبعا بحكم طبيعته ان في مواقف كتير ما بيركزش فيها كان بيحصل مشاكل كتيير و كانت هي بتحلل المواقف بطريقه تظلمه جواها لانها مش متخيلة ان بذكائه دا مبياخدش باله .. و وصلت لمرحلة انها بقيت متأكده ان في غلطات بعملها بقصده و في النهاية وبعد سنة وصلت لتحليل للموقف ان ( احمد مبيحبنيش و انا عجبته كبنت وشاف انه عروسة مناسبة ليه , لكن عدم اهتمامه ده اكبر دليل على انه مش بيحبني)..
بعدها اخدت قرار انها هتسأله سؤال هتحدد بعده ايه هيحصل..
- احمد انت لما بتحلم لينا بايه كمان 10 سنين ؟؟
- حبيبتي بحلم حلم من اول يوم شفتك ان كل يوم لما اروح البيت اخد بنتنا على رجلي احكيلها ( حكاية الاميرة) .. نفس الحكاية كل يوم .. و في اخر الحكاية هخليها تيجي تسألك سؤال .. عارفه هخال..
- احمد انا بقولك بتحلم ب ايه تقولي حكاية ..و لما اروح .. هي دي احلامك؟!! دي احلام عريس عايز يتجوز...
- ممكن تفهميني بس..
- احمد انا مش عايزه افهم حاجة .... انا من اول الموضوع وانا متأكده انك عمرك ماحبتني و انك من الاول حسبتها بدماغك.. عمتا خلينا نقفل الموضوع ده واحنا غاليين على بعض ..
بحكم انهم مكانوش حاكيين لحد اللي بينهم مكنش في طرف تالت ممكن يتدخل لحل الموقف او الصلح و دا كان اخر تليفون بينهم... و عدت السنييين 5 سنين
في يوم بالصدفة احمد قابل واحد صاحبه كان بقاله 4 سنين من ايام الكلية ماقبلوش وقفوا وسلموا و صاحبه عزمه على خطوبته بعد اسبوع .. خطوبته هو و هبه !!
- الف مبروك يا ريس بس اصل انا..
- بقولك ايه هستناك كل الناس القديمة هتبقى موجوده ولازم تيجي
- خلاص حاضر ان شاء الله
يوم الخطوبة داخل القاعه فجأة همهمات كثيرة و علامات قلق ظهرت فجاة على كل الوشوش .. يا جماعة احمد عمل حادثة وهو جاي و نقلوه المستشفى ادعولوه ..
خلص اليوم و الناس اطمنت على احمد انه بقى كويس بس محتاج عمليه هيعملها خلال اسبوع لما حالته تستقر.. طب الحمد لله .. ارتاحت اعصاب الجميع و عدى اليوم
بعد اسبوع هبه و خطيبها بيزوروا احمد في المستشفى ليلة العمليه بعد اشاعات ان حالته مش مستقره.. وهما قاعدين معاه دخلت بنوتة بتجري و لما لقيت في ضيوف اتكسفت وجت تخرج .. نادى عليها احمد تعالي يا لوكا .. جت تجري عليه ودخلت في حضنه ..
طبعا بالنسبة لهبة كان الموضوع واضح جدا .. يعني اتجوزت و خلفت يا احمد ؟ و بنت عندها مش اقا من 4 سنين ؟؟ كان عندي حق فعلا في كل حاجة عملتها .. فعلا عمرك ما حبتني .. قطع عليهم تفكيرهم احمد بيصرخ من وجع فجأة و دخل دكتور و ممرضات و ستاذنوا منهم يستنوا في صالون جنب الاوضة بحكم الموقف خرجت هبه و خطيبها و اخدوا معاهم البنت الصغيرة وطبعا كانت بتعيط من الموقف..
دخلوا الصالون وهبه قعدت و اخدت البنت على رجلها وبدات تهديها..
- انت اسمك ايه يا حبيبتي؟
- لوكا
- الله حلو اوي الاسم ده .. عندك كام سنة يا لوكا؟
- شاورت بايديها 4.5 بطريقه كان احمد بيعملها زمان و كانت هبه بتحبها
- طنط هو انت صاحبة عمو احمد؟
- عمو؟؟!! هو احمد مش بابا يا حبيبتي؟
- لأ عمو احمد اخو بابا عمر يا طنط ( بينها و بين نفسها هبه : استغفر الله ظلمتك )
- طنط احكيلك حدوتة ؟؟
- حدوتة ايه يا حبيبتي؟؟
- حدوتة اسمها ( حكاية اميرة ) عمو احمد كل يوم بيحكيهالي بس امبارح مش حكهالي L
- !!!! حكاية اميرة؟؟ طب خلاص احكيهالي يا لوكا
و بدأت البنت تحكي الحدوتة اللي بتتكلم عن ولد حب بنت بس مكنش عارف يقولها وعشقها كله لدرجة انها اتخلطت جوه حياته و في كل تفكيره .. و كان الولد كل يوم بيرسم رسمة لبكرة بتخقق زي ما رسمها بضبط .. و كان كل يوم بيسأل حبيبته عايزه نرسم ايه بكرة بشرط تبقى انت البطلة في الرسمة .. كان بيحاول ديما يضمن انها هتكون موجوده بكره معاه . لانه ميقدرش يعيش من غيرها كانت رسوماته كلها لبكرة باختلاف الرسمة بيبقى الاصل ورقة بيضة مرسوم فيها حبيبته وبعد كده يرسم بكره ده... بس كده يا طنط تحبي بقى نرسم ايه لبكرة ؟؟
و هنا كانت صدمة هبة .. هو دا السؤاااال يا احمد؟؟؟ طب ليه مقولتليش ساعيتها مكانش كل دا حصل؟؟ طب ازاي انت حبتني الحب ده كله وانا محسيتش بيك؟؟ انا اسفه بجد لحبك ليا ..
تكملة القصة متفرقش معايا كل واحد يخلصها زي ما هو عايز .. النتيجة واحده .. فراق
وجهة نظري اللي كنت اقصدها في اول الكلام ان كل قصص الحب بتبدأ بكلمة بحبك و بتخلص ب وانا كمان بحبك.. الفرق ديما بيبقى في الوقت الفاصل بينهم و الاحداث اللي حصلت يا بتخلي الحدوتة حلوة اوي يإما بتكون اخرتها فراق
كمان حياتنا حدوتة صغيرة لو لقيت فيها حد بيحبك من جواه متظلموش بتفكيرك .. لو متأكد انه بيحبك ديما دور على مبرر لافعاله لازم هتلاقي.. مش معقول يكون بيحبك و عايز يوجعك.. حياتنا قصيرة اوي و للاسف مفيهاش إعادة متفوتش لحظة و انت مش مركز لانها لو عدت منك ممكن تبوظلك الحدوتة كلها وتفضل حياتك كلها مش مستمتع بيها.... من وجهة نظري اهم جزء مهم في اي علاقة حب انك ديما تقدر قيمتك جوى حبيبك وانك تستمتع بحبه ليك....
النهاية